Mae Cyngor Sir Ynys Môn wedi rhoi Hysbysiadau Gwella o dan reoliadau Covid-19 i dri eiddo trwyddedig ar ôl iddyn nhw dorri rheolau diogelwch.
Daeth yr Hysbysiadau Gwella ar ôl i wiriadau a gynhaliwyd gan Swyddogion Gwarchod y Cyhoedd a Heddlu Gogledd Cymru.
Y mannau sydd wedi derbyn Hysbysiadau Gwella yw:
- Bulkeley Arms, Porthaethwy
- Gwesty’r Bull, Y Fali
- Y Chester Inn, Caergybi
Byddent nawr yn cael eu monitro er mwyn sicrhau bod mesurau priodol yn cael eu rhoi yn eu lle. Bydd methu â gwneud hyn yn golygu y bydd y Cyngor Sir yn rhoi Rhybudd Cau Eiddo i’r mannau trwyddedig hynny.
Dywedodd Prif Swyddog Gwarchod y Cyhoedd, Les Pursglove: “Mae mwyafrif y mannau lletygarwch ar Ynys Môn yn gweithio’n ofnadwy o galed er mwyn cadw cwsmeriaid yn ddiogel a sicrhau eu bod yn cydymffurfio â’r rheoliadau Covid-19.”
“Yn anffodus, mae’r mannau a restrir uchod wedi anwybyddu rhybudd blaenorol a roddwyd iddynt gan olygu eu bod bellach wedi derbyn Hysbysiad Gwella.
Ychwanegodd, “Rydym yn deall bod hwn yn gyfnod ansicr i fusnesau ac mae ein swyddogion wrth law i gynnig cyngor ac arweiniad os oes angen.”
Mae Tîm Gwarchod y Cyhoedd y Cyngor bellach yn cydweithio â deiliaid trwydded er mwyn eu cefnogi i wneud gwelliannau a chadw pawb yn ddiogel.
Gallai eiddo sy’n methu â gweithredu mesurau diogelwch Covid-19 pan fyddant yn ail agor yn dilyn y cyfnod clo byr wynebu camau pellach megis derbyn Rhybudd i Gau.
Eglurodd y Prif Arolygydd Owain Llewelyn o Heddlu Gogledd Cymru: “Byddwn yn parhau i gynnal ymweliadau ar y cyd â Swyddogion Cyngor Sir Ynys Môn er mwyn sicrhau bod pob eiddo trwyddedig yn dilyn y rheolau a rheoliadau Coronafeirws.”
Ychwanegodd, “Mae’n bwysig cofio bod busnesau yn chwarae rôl hanfodol o ran helpu i atal lledaeniad y Coronafeirws a byddwn yn gwneud popeth o fewn ein gallu i gadw ein cymunedau’n ddiogel.”
Gellir dod o hyd i’r rheoliadau Coronafeirws a cwestiynnau a ofynnir yn aml yma:
https://llyw.cymru/rheoliadau-coronafeirws-canllawiau
Diwedd 23.10.20